Tama

Qatt ma ħsibt li l-ġenituri tiegħi setgħu jaslu biex jinfirdu. Iżda hekk ġara u  bdew jiġu f’moħħi ħafna ħsibijiet ta’ dwejjaq u kont inħossni mħawwad; kont nibża’  minn dak li kien ser iġib miegħu l-ġejjieni u minn ħajja li ma kenitx ser tibqa’ l-istess. Jien u ż-żewġ ħuti bqajna ngħixu mal-mama, “supermama”, kif konna nsejħulha. Imma l-ħajja  inbidlet għal kollox. Qabel, qatt ma kellna problemi l-iskola, iżda issa kienu bdew il-problemi. Malli ndunajna, bdejna nfittxu li nagħmlu xi ħaġa għax ridna naraw il-mama kuntenta. Mhux faċli ngħixu mingħajr il-papa, iżda sa minn meta konna żgħar il-ġenituri u n-nanniet għallmuna ma niġġudikawx. Wieħed mill-isbaħ mumenti hu l-ħin tat-talb meta nitolbu flimkien li sseħħ ir-rieda t’Alla għal kull wieħed minna. P. L. – Colombia 

Student diffiċli

Xi snin ilu, wieħed mill-istudenti fil-klassi  tiegħi kien tassew diffiċli; kien jgħix sitwazzjoni iebsa fil-familja tiegħu. Xi drabi kien ikun vjolenti u għalhekk xi ġenituri marru jipprotestaw mas-surmast. Ġie mhedded li jitkeċċa mill-iskola; u ħassejt li għandi nitlob -permess biex nibda nieħu ħsiebu jien personalment. Tkellimt mal-kollegi tiegħi u sibt kollaborazzjoni anki mill-istudenti. Familja ħbieb tiegħi għamlu kuntatt mal-ġenituri tiegħu biex jgħinuhom fis-sitwazzjoni li kienu fiha. Għaddew bosta snin u erġajt mort f’dik il-belt. Kont ili nieqes ħafna minn hemm meta erġajt iItqajt ma’ dan l-istudent.Sibt li issa kien sar raġel, missier li qed jieħu ħsieb sew il-familja tiegħu. . – Italia

Il-kejk
Wieħed mill-ġirien beda’ jsib ħafna oġġezzjonijiet meta bdejna nagħmlu xi xogħolijiet fid-dar tagħna. Żewġi xaba’ jirċievi ittri mingħandu biex jipprotesta meta dan ma kellux raġuni għalfejn u mar ikellem avukat biex jara jiftaħlux kawża. Iżda mbagħad meta bdejna nitkellmu bejnietna dwar din is-sitwazzjoni, il-qalb issuġġeriet li nagħżlu triq oħra: ħsibna li jkun aħjar jekk nippruvaw nagħmlu xi ħaġa biex nibnu pont bejnietna. Lestejt kejk u morna għandu. Kif wasalna, qalilna: “Kif kontu tafu li llum hu l-birthday ta’ binti?” Il-laqgħa li konna qed nibżgħu minnha nbidlet f’waħda li ġabitna flimkien. Xi ġranet wara ġew iżuruna huma u llum għandna ħbieb ġodda. – Spagna

Il-ħajt
Seba’ snin ta’ żwieġ ma wassluniex biex inkunu qalb waħda kif xtaqna. Imdejjaq u sfiduċjat wasalt biex ngħid li dan kien kawża ta’ immaturità u ta’ karattri li ma kienu jaqblu f’xejn. Bdejna niġġudikaw lil xulxin u l-ħajt li kien qed jifridna kompla dejjem jikber.  Bdejna wkoll inħossu ċertu sens ta’ ħtija għax lil uliedna ma konniex qed nagħtuhom xhieda tal-imħabba tagħna bħala koppja. Meta konna qtajna qalbna kważi għal kollox, xi ħbieb tagħna li jgħixu l-Vanġelu bdew jgħenuna nwaqqgħu l-ħajt li nbena bejnietna. F’marti bdejt nilmaħ sinjali li tawni t-tama. Bdejna nitgħallmu nilqgħu lil xulxin, nitolbu skuża, naraw lil xulxin bħala rigal u nqisu l-fallimenti tagħna bħala okkażjoni biex nerġgħu nibdew inħobbu lil xulxin. Bil-għajnuna tal-ħbiberija u t-talb tal-oħrajn intbaħna  li Alla jħobbna u li hu jieħu ħsieb il-familja tagħna. – Italia

Ħabiba tagħna timrad
Sirna nafu li l-ħabiba tagħna Lia, li t-tfal tagħha għadhom teenagers, għandha cancer. Il-komunita’ kollha ngħaqdet magħha f’katina ta’ talb u b’ġesti ta’ solidarjeta’. Bdejna niltaqgħu l-Knisja darba fil-ġimgħa għall-siegħa adorazzjoni biex nitolbu għall-fejqan tagħha.
Ippruvajna nifhmu kif stajna nħeffu xi ftit mis-sitwazzjoni diffiċli li kienet tinsab fiha. Kien hemm min beda jieħu ħsieb it-tisjir, attent li jsajjar ikel li jkun tajjeb għaliha; kien hemm min għen billi ta xi flus ħalli jinxtraw il-mediċini meħtieġa. Dawn l-atti żgħar ta’ mħabba għenu li din il-ħabiba tagħna biex ma tħosshiex waħidha imma biex tħossha tassew parti mill-komunita’. Meta saħħitha kienet tippermetti hi kienet taqsam l-esperjenza tagħha fil-laqgħat li kien ikollna. Wara kors ta’ kemoterapija, t-tumur sparixxa, Ħassejna li din kienet tweġiba għat-talb tagħna u għall-impenn li nħobbu u naqdu lil din il-persuna bl-aħjar mod li stajna. (C.V., Brazil)

Minkejja l-azzjonijiet ħżiena li rċevejt
Wara l-mewt ta’ żewġi, ġarrabt ħafna umiljazzjoni: qrabatu riedu jitfugħni l‘ barra mid-dar fejn minn dejjem għexna flimkien. Wieħed minn ħut żewġi, li kien ukoll il-parrinu ta’ wieħed mill-erbat itfal tagħna beda jqajjem ħafna problemi. F’daqqa waħda dan marad, u kull darba li ma kienx ikun tajjeb kont immur nixtrilu l-mediċina biex itaffi xi ftit mill-uġigħ. Il-ġirien kienu jgħiduli: “Kif tmur taqdih meta ġarrabt daqshekk azzjonijiet ħżiena minnu?” Kont ngħidilhom: tħobb għalija tfisser li npoġġi ruħi għas-servizz tal-oħrajn. Ftit wara, ħu żewġi miet u jien bqajt immur ngħin lil martu fl-affarijiet li kien jieħu ħsiebhom hu. Irringrazzjatni quddiem kulħadd u llum din tgħix magħna; tassew li aħna familja waħda. (R.P., India)

L-espert tal-mushrooms
Waqt li kont mixi fil-bosk niġbor il-mushrooms, nara raġel mixħut fl-art. Ersaqt lejh biex ngħinu. Kien qed jirtgħod u pprova jindikali fejn kien joqgħod: container kollu msaddad qalb is-siġar fil-qrib. Għentu jasal sal-container u poġġejtu fuq l-ispeċi ta’ sodda li kien hemm fiha. Erġajt mort inżuru bosta drabi u kont noħodlu l-ikel u l-mediċini.
Kien espert kbir tal-mushrooms u kien jaqla’ l-għixien tiegħu billi jbigħhom. Fil-ħin li kont ngħaddi miegħu għallimni fejn nista’ nsib l-aħjar mushrooms u kif kelli naqlagħhom mill-ħamrija. Irrakkuntali wkoll dwar ħajtu: dwar il-fallimenti li kellu bil-business u kif sab ruħu waħdu abbandunat.
Darba mort u sibtu tassew ħażin ħafna: kellu ħafna deni. Qalli: “ Issa ormaj taf kollox dwari, iżda l-aktar ħaġa importanti hi li jiena dejjem emmint f’Alla. Il-fatt li ltqajt miegħek huwa sinjal mingħandu”. Imbagħad qalli li kellu xi flus moħbija u talabni noħodhom u nagħtihom lil xi ħadd li tassew kellu bżonnhom.
Kull darba li mmur niġbor il-mushrooms, naħseb fih bħal anġlu li jiggwidani” (R.S. Poland)