Download pdf

“L-ikbar wieħed fis-Saltna tas-Smewwiet huwa dak li jċekken lilu nnifsu bħal dan it-tfajjel żgħir” (Mt 18, 4).

Min hu l-akbar, l-aqwa, ir-rebbieħ fis-soċjetà, fil-Knisja, fil-politika, fis-suq?

Din il-mistoqsija tifridna minn xulxin, turina l-għażliet li rridu nagħmlu, tiddeċiedi l-passi li rridu nieħdu. Din hi l-loġika li tirbaħ fuq kollox, u bla ma nindunaw inħaddmuha, forsi bix-xewqa li niksbu riżultati tajba u effiċjenti għal ta’ madwarna.

Hawnhekk il-Vanġelu ta’ San Mattew jurina d-dixxipli ta’ Ġesù li, wara li laqgħu l-aħbar tas-Saltna tas-Sema, iridu jkunu jafu x’irid ikollhom biex ikunu nies li jirnexxu fost il-poplu ġdid t’Alla: “Min hu l-ikbar wieħed”. Id-dixxipli ta’ Ġesù lanqas kienu jobsru t-tweġiba tiegħu: poġġa tifel żgħir f’nofs il-folla u qalilhom:

“L-ikbar wieħed fis-Saltna tas-Smewwiet huwa dak li jċekken lilu nnifsu bħal dan it-tfajjel żgħir”.

Minflok il-mentalità ta’ kompetizzjoni u dik ta’ ‘m’għandi bżonn lil ħadd’, Ġesù poġġa ʼl min m’għandux biex jiftaħar u x’jiddefendi; lil min jiddependi għal kollox u jafda lilu nnifsu f’idejn ħaddieħor. Ma jfissirx li għandna nkunu moħħ ir-riħ, jew li ma nkunux responsabbli, imma li nagħmlu att ta’ volontà u ta’ libertà. Infatti Ġesù jitlobna nkunu ċkejknin, u li b’deċiżjoni nibdlu r-rotta ta’ ħajjitna.

“L-ikbar wieħed fis-Saltna tas-Smewwiet huwa dak li jċekken lilu nnifsu bħal dan it-tfajjel żgħir”.

Chiara Lubich tfissrilna min hu dan it-tfajjel tal-Vanġelu: “[…] tifel żgħir jintelaq b’fiduċja f’idejn missieru u ommu: jemmen li huma jħobbuh. […] In-nisrani veru, bħal tifel żgħir, jemmen li Alla jħobbu, jintefa’ fi ħdan Missierna tas-Smewwiet, jafda għal kollox fiH. […] It-tfal iż-żgħar jiddependu għal kollox mill-ġenituri tagħhom, […]. Aħna wkoll, bħal dak it-‘tfajjel tal-Vanġelu’, niddependu għal kollox mill-Missier: […] Hu jaf x’neħtieġu, qabel ma aħna nitolbuH, u Hu jagħtihulna. L-istess saltna t’Alla mhix xi ħaġa li tirbaħha, imma nilqgħuha bħala rigal minn idejn il-Missier”.

Chiara terġa’ tisħaq fuq l-importanza li t-tifel iż-żgħir jafda bi sħiħ f’missieru u jitgħallem kollox mingħandu. L-istess ħaġa: ‘it-tfajjel tal-Vanġelu’ jintelaq għal kollox fil-ħniena t’Alla u, bla ma jkompli jiftakar fl-imgħoddi, kuljum jibda ħajja ġdida, lest li jilqa’ dak li jgħidlu l-Ispirtu, ikun dejjem krejattiv. It-tifel żgħir ma jitgħallimx jitkellem waħdu, għandu bżonn lil min jgħallmu. Id-dixxiplu ta’ Ġesù […] jitgħallem kollox mill-Kelma t’Alla, sa ma jibda jitkellem u jgħix skont il-Vanġelu”.

It-tfajjel minn jeddu jibda jimita lil missieru. “Hekk ukoll it-‘tfajjel tal-Vanġelu’, […] lil kulħadd iħobb għax il-Missier ‘itella’ x-xemx tiegħu sew fuq il-ħżiena u sew fuq min mhuwiex, u jniżżel ix-xita tiegħu sew fuq il-ħżiena u sew fuq it-tajbin’; jibda jħobb hu l-ewwel għax Hu ħabbna meta konna għadna midinbin; iħobb bla ma jistenna xejn lura, bla interessi ta’ xejn għax l-istess jagħmel il-Missier tagħna tas-smewwiet” .

“L-ikbar wieħed fis-Saltna tas-Smewwiet huwa dak li jċekken lilu nnifsu bħal dan it-tfajjel żgħir”.

Fil-Kolumbja (pajjiż fl-Amerka t’Isfel), Vicente u l-familja tiegħu għaddew mill-prova tal-pandemija, meta fil-pajjiż kien hemm ordnijiet stretti ħafna li ħadd ma jista’ joħroġ barra. Kitbilna hekk: “Meta ma stajniex aktar noħorġu, f’daqqa waħda l-ħajja nbidlet. Marti u ż-żewġt itfal kbar tagħna riedu jħejju ruħhom għall-eżamijiet tal-università; iż-żgħir ma setgħax jidra l-lezzjonijiet on-line. Id-dar ħadd ma kellu ħin jieħu ħsieb l-oħrajn. Qalb dan it-taħwid kollu, meta konna wasalna biex nisplodu, fhimt li dik kienet opportunità biex ngħix bis-serjetà l-arti tal-imħabba fil-‘ħajja ġdida tagħna’, dik li nintefa’ ngħix il-Vanġelu.

Bdejt billi għamilt ftit ordni fil-kċina, kont insajjar u norganizza l-ikliet. Jien m’iniex xi kok espert, lanqas ma jien preċiż fit-tindif, imma fhimt li b’dak li kont qed nagħmel jien kien qed jgħin biex innaqqsu n-nervi ta’ bejnietna. Dak li b’att ta’ mħabba bdejt nagħmel jien, għal xhur sħaħ bdew jagħmluh ukoll l-oħrajn. Meta l-membri l-oħra tal-familja spiċċaw mill-impenji tagħhom, bdew jgħinu fit-tindif, u jpoġġu kollox f’postu. Flimkien indunajna li kliem il-Vanġelu hu veru u li l-fantasija tal-imħabba tissuġġerixxi x’għandna nagħmlu biex ngħixu f’ordni u armonija”.

Letizia Magri

https://soundcloud.com/user-63571203/august-2021

The United Nations together set 17 important goals to accomplish by 2030 to make the world a better place. One of them is ZERO HUNGER, and the United Nations want us Teens4Unity from all over the world to help. Together we can ensure that no one in the world will ever have to suffer hunger.

On Saturday 24th July, 2021, an international virtual meeting was held by Teens4Unity to set up an international committee. Teenagers from different countries were able to share what they have already done for the Zero Hunger challenge and explore new ideas. An amazing opportunity: from Venezuela to Spain, Portugal, Corea, Pakistan, India …

Our Maltese representative was Maya Ungaro, 14 years old, who explained the poverty situation in Malta and shared a video about the various Zero Hunger Challenge activities the local Teens4Unity held over the last couple of years.

Teens4Unity Malta

Presentation of “Dare to Care” project in Malta and highlights of United World Week activities around the world.

Download pdf

“Agħmel il-qalb, binti; il-fidi tiegħek fejqitek” (Mt 9, 22).

Ġesù kien miexi mdawwar bil-folla: missier iddisprat talbu jmur jgħin lil bintu li kienet waslet fl-aħħar. Huwa u sejjer, Ġesù kellu laqgħa oħra: minn qalb in-nies ħarġet mara li kienet ilha tbati bit-tnixxija tad-demm għal ħafna snin. Din il-kundizzjoni kienet serja ħafna, anki għaliex minħabba fiha kellha bilfors tnaqqas il-kuntatti mal-familja tagħha u ħbiebha. Hi ma sejħitlux lil Ġesù, ma kellmitux, imma resqet maġenbu minn warajh u messitlu t-tarf tal-libsa. Bejnha u bejn ruħha qalet hekk: “Imqar jekk immiss il-libsa tiegħu, infiq minn din il-marda kiefra”.

Ġesù dar, lemaħha u serħilha rasha billi qalilha: il-fidi tiegħek salvatek. Ma fiqitx biss imma bil-ħarsa li Ġesù ta, iltaqgħet mal-imħabba t’Alla.

“Agħmel il-qalb, binti; il-fidi tiegħek fejqitek”. 

Din il-ġrajja meħuda mill-Vanġelu ta’ San Mattew, lilna wkoll tiftħilna orizzonti mhux mistennija: Alla jinsab dejjem riesaq lejna, imma Hu jistenna li aħna nieħdu l-inizjattiva biex ma nitilfux l-appuntament miegħU. Il-mixja tagħna ta’ fidi, li tgħaddi minn mogħdijiet iebsa li fihom niżbaljaw, inħossuna dgħajfa u nibqgħu b’xiber imnieħer, hi mixja prezzjuża. Hu l-Mulej tal-Ħajja vera u din il-Ħajja jrid ixerridha fuqna li aħna wliedu u l-ebda ċirkustanza ma tista’ tħassar din id-dinjità ta’ wlied Alla.

Għalhekk illum Ġesù qed jgħid lilna wkoll:

“Agħmel il-qalb, binti; il-fidi tiegħek fejqitek”. 

Biex ngħixu din il-Kelma tal-ħajja, tista’ tgħinna meditazzjoni ta’ Chiara Lubich dwar din il-frażi: “Fil-fidi, il-bniedem juri b’mod ċar li ma jserraħx fuqu nnifsu imma jafda f’Min hu aqwa minnu. […] Lil dik il-mara mfejqa, Ġesù jsejħilha: ‘binti’, biex juriha dak li tassew jixtieq jagħtiha: mhux biss il-fejqan fil-ġisem, imma l-ħajja divina li tista’ ġġedidha kollha kemm hi. Infatti Ġesù jagħmel il-mirakli biex in-nies tilqa’ s-salvazzjoni li qed iġibilna, il-maħfra, dak id-don tal-Missier li hu Huwa nnifsu u li meta jasal fuq il-bniedem jibdlu mill-qiegħ. […]

Mela kif se ngħixuha din il-Kelma? Ngħixuha billi fil-bżonnijiet serji tagħna nuru ʼl Alla li aħna nafdaw fiH. Din l-imġiba żgur ma terfagħniex mir-responsabiltajiet tagħna, ma teħlisniex milli nagħmlu l-almu kollu tagħna. […] Imma jista’ jkun li l-fidi tagħna tkun qed tgħaddi minn prova. Naraw dan propju f’din il-mara li qed tbati, li għarfet tirbaħ l-ostaklu tal-folla li kien hemm bejnha u bejn l-Imgħallem. […] Għalhekk irridu nemmnu, b’dik il-fidi li ma tiddubitax quddiem il-provi. U rridu wkoll nuru ʼl Ġesù li fhimna d-don immens li Hu ġabilna, id-don tal-ħajja divina. U filwaqt li nirringrazzjawH, nikkorrispondu magħha”[1].

“Agħmel il-qalb, binti; il-fidi tiegħek fejqitek”. 

Din iċ-ċertezza tagħtina l-ħila nwasslu l-fejqan billi b’għożża “mmissu” ʼl min għaddej mit-tbatija, lil min jinsab fil-bżonn, fid-dlam u mifxul. Hekk ġralha omm mill-Venezwela, li kellha l-ħila taħfer: “Kelli bżonn iddisprat ta’ għajnuna, u ħadt sehem f’laqgħa fuq il-Vanġelu, li fiha smajt kliem Ġesù: ‘Henjin dawk li jġibu l-paċi, għax huma jissejħu wlied Alla’[2], ‘Ħobbu l-għedewwa tagħkom’[3]. Jien kif stajt naħfer lil min qatel  lil ibni? Imma issa fija daħlet żerriegħa u fl-aħħar mill-aħħar rebħet id-deċiżjoni tiegħi li naħfer. Issa tassew nista’ nissejjaħ “bint Alla”. Dan l-aħħar sejħuli biex niġi wiċċ imb’wiċċ mal-qattiel ta’ ibni, għax kien inqabad. Kienet esperjenza iebsa, imma l-grazzja għenitni. F’qalbi ma kienx hemm mibegħda u lanqas sens ta’ tpattija, imma biss ġietni ħniena minnu u f’qalbi fdajtu fil-ħniena t’Alla”.

Letizia Magri

[1] C. Lubich, Parola di Vita luglio 1997, in eadem, Parole di Vita, a cura di Fabio Ciardi (Opere di Chiara Lubich 5; Città Nuova, Roma, 2017) pp. 583-585.

[2] Cf. Mt 5, 9.

[3] Cf. Lc 6, 35.

https://soundcloud.com/user-63571203/juy-2021

Fil-waqt li qed tkompli tiżdied dejjem aktar il-vjolenza fl-Art Mqaddsa, fil-Kolumbja, f’Myanmar u f’diversi pajjiżi tal-Afrika, il-President tal-Fokolari tappella lill-komunità tal-Moviment fid-dinja kollha sabiex mill-ġdid ipoġġu d-djalogu u t-talb, toroq li jwasslu għall-paċi vera, fil-qalba tal-ħajja u ta’ kull ħidma.

Ma nistgħux ma nisimgħux l-għajta ta’ tbatija li f’dawn il-ġranet qed tasal minn bosta postijiet fid-dinja, għax mill-ġdid il-paċi hi mhedda.

Qed nirreferi għall-protesti  ta’ vjolenza li ilhom isiru għal bosta ġranet f’diversi bliet tal-Kolumbja, għall-poplu ta’ Myanmar li ilu jbati xhur sħaħ u s’issa  għadu mhux qed jara  ebda xaqq ta’ dawl dwar paċi u libertà, għal diversi postijiet fl-Afrika li minħabba motivi differenti huma mifnija bi vjolenzi li qishom ma jispiċċaw qatt.

U x’ingħidu għas-sitwazzjoni li reġgħet faqqgħet f’dawn il-ġranet f’Ġerusalemm, f’Haifa, fl-istrixxa ta’ Gaza u f’ħafna bliet oħra tal-Art?

Hi sitwazzjoni li nħossha fuq ġildi; l-aħbarijiet dwar bumbardamenti u mwiet li qed jiżdiedu kuljum, qed jerġgħu jkebbsu f’qalbi  tbatija kbira, anki għax din hi l-art fejn twelidt u kbirt.

Lil dawk kollha li qed jgħixu f’dawn is-sitwazzjonijiet ta’ vjolenza u li spiss jirriskjaw ħajjithom, nixtieq ngħidilhom li jien magħquda  magħhom aktar minn qatt qabel! Noffri u nitlob kuljum biex il-bumbardamenti u l-vjolenza bejn gruppi differenti jiefqu, ħalli ma jintilfux aktar ħajjiet, u biex  il-paċi terġa’ tkun il-ġid suprem għal kull persuna, għal kull poplu u gvern.

Din l-art b’feriti fondi, iżda wkoll b’ħafna rikkezza frott tal-popli differenti  li jgħammru fiha, naqqxet f’ruħi ċ-ċertezza li d-djalogu biss, xi drabi mgħix anki b’mod erojku,  jista’ jibni l-paċi vera f’dawk il-postijiet fid-dinja fejn hi nieqsa.  Illum qed inħoss li għandi nistieden lil kulħadd biex  niskopru mill-ġdid li aħna lkoll aħwa, ulied tal-istess Missier, bla  ma nħallu  l-mibegħda taħkimna jew  naqgħu fit-tentazzjoni li naraw biss il-parti tagħna.

Ejjew  flimkien nieħdu l-impenn li npoġġu r-rikonċiljazzjoni u d-djalogu fiċ-ċentru tal-ħsieb tagħna u tal-ħajja tagħna, tal-ħajja tal-komunitajiet tagħna, tal-popli tagħna:  djalogu ma’ kulħadd, bla ma nħallu barra lil ħadd, djalogu li jissarraf f’politika ġusta li tilqa’ u tirrispetta d-diversità.

Jibqa’ l-fatt li jista’ jkun hemm sitwazzjonijiet estremi u ta’ disperazzjoni fejn jidher impossibbli li ssib soluzzjoni, iżda ħafna drabi sperimentajna li l-imħabba dejjem issib il-mezz kif tasal fil-qalb tal-ieħor. Hemm kitba ta’ Chiara Lubich dwar dan li dejjem timlieni bit-tama u bil-kuraġġ, u nixtieq naqsamha magħkom:

“Jekk aktar bnedmin jaċċettaw it-tbatija għall-imħabba, it-tbatija għall-imħabba tista’ ssir l-arma l-aktar qawwija li tagħti lill-umanità d-dinjità l-aktar għolja tagħha:  li mhijiex wisq li tħossha ġabra ta’ popli, wieħed ħdejn l-ieħor, iżda li tkun poplu wieħed, familja waħda”.

Ejjew inżommu t-tama ħajja! Fil-waqt li nġeddu l-imħabba tagħna lejn xulxin, ejjew nitolbu aktar  għal min qed ibati, għal dawk li tilfu ħajjithom, għal min m’għandux ċertezza dwar il-ġejjieni. Imma fuq kollox ejjew nitolbu lil Alla li jagħtina l-ġid l-aktar kbir għall-bnedmin kollha: id-don ta’ paċi ġusta u dejjiema.

Margaret Karram
President tal-Moviment tal-Fokolari

“Għaddiet ġimgħa minn meta għamilna t-test u rriżulta pożittiv. Mhux qed infittxu informazzjoni fuq l-internet, mhux qed naraw aħbarijiet u lanqas qed ingergru. Qed ngħixu ġurnata wara l-oħra. U l-affarijiet sejrin għall-aħjar. It-talb tagħkom, il-messaġġi, ix-xewqat sbieħ u l-ikel mimli mħabba li qed jaslilna qed ikomplu jagħtuna l-forza. Inħossukom tassew qrib tagħna u veru qed tgħinuna. Grazzi mill-qalb tal-barkiet li qed jaslulna”.

Dan il-messaġġ WhatsApp, intbagħat minn familja tal-komunità tal-Fokolari f’Mumbai, u f’dan iż-żmien ta’ dlam hu tassew raġġ ta’ tama u kuraġġ. Ma tgħaddix ġurnata li ma tismax bil-mewt ta’ xi kollegi, ħbieb u xi drabi anki familjari. U dan flimkien ma’ aħbarijiet li sistemi qed jikkrollaw u li familji mhux qed jirnexxilhom jagħtu d-dinjità xierqa lill-għeżież tagħhom morda jew mejtin.

Fl-Indja hemm popolazzjoni enormi (1,3 miljardi), allura wieħed kien jistenna li n-numru ta’ kasijiet kien ser ikun għoli ħafna. Għal sena sħiħa, sal-aħħar ta’ April li għadda, il-pajjiż irnexxilu jikkontrolla s-sitwazzjoni, iżda issa kollox qed tmur dejjem għall-agħar. Is-sistema sanitarja publika mhux qed tlaħħaq mat-talba għal mediċini, ossiġnu u ventilaturi li hemm bżonn, barra l-fatt li hemm varjanti tal-virus f’partijiet differenti tal-pajjiż.

Matul il-pandemija l-komunità tal-Fokolari ħadmet bla waqfien. Illanċjat azzjoni ta’ qsim tal-ġid fuq livell nazzjonali biex setgħet toffri għajnuna ekonomika lil min tilef ix-xogħol jew lil min għandu bżonn ta’ fondi biex jixtri l-bżonnijiet ta’ kuljum. Il-proġett Udisha mwaqqaf mill-Moviment tal-Fokolari fl-Indja għen lil madwar 80 familja li jgħixu f’Mumbai b’ikel, mediċini, kotba, ħlas ta’ iskola, ta’ kera jew ta’ kontijiet tad-dawl, eċċ. U waqt li t-tieni mewġa tal-pandemija tinsab fl-aqwa tagħha, xi żgħażagħ qed ikomplu bil-proġett #DaretoCare billi darba kull ħmistax imorru jqassmu l-ikel lil dawk li jgħixu barra fit-triq.

Bħalissa, l-enerġija tal-komunità qed tintefa’ l-aktar fejn hemm bżonn l-għajnuna sanitarja biex jkunu salvati l-ħajjiet tan-nies. Ftit ilu, l-isptar Holy Family f’Mumbai għamel talba urġenti għall-ċilindri tal-ossiġnu meħtieġa għal 160 sodda ta’pażjenti Covid; il-komunita’ mill-ewwel wieġbet billi sabet sponsors li setgħu jgħinu u issa qed tfittex oħrajn.

Waqt li din it-tieni mewġa qed tkompli taħkem bil-qawwa kollha tagħha, il-familji tal-Moviment ħassew il-bżonn li jgħinu lil xulxin aktar mill-qrib anki billi jibdew jiltaqgħu kuljum online għal nofs siegħa ta’ talb flimkien. Dan qed ikun ta’ sostenn biex jegħlbu n-niket, in-nuqqas ta’ħila quddiem din is-sitwazzjoni, u anki s-solitudni. Fl-ewwel żmien tal-Moviment, il-komunità ta’ Trento, skopriet li Alla hu mħabba propju meta t-tieni gwerra dinjija kienet fl-aqwa tagħha; u issa hawnhekk il-komunità Indjana qed tiskopri li t-talb flimkien online hu mod qawwi kif jesprimu r-realta’ ta’ familja waħda, ikoll indaqs, magħquda fl-imħabba t’Alla.

Annabel Dsouza (Mumbai, India)

Il-bieraħ filgħodu, il-Ħadd 2 ta’ Mejju, Sergio Mattarella, il-President tal-Italja, għamel żjara privata fiċ-Ċentru Internazzjonali tal-Moviment tal-Fokolari f’Rocca di Papa.

“Kuntent li ninsab hawn u grazzi ta’ din il-merħba. Is-sehem li l-Moviment tal-Fokolari jagħti lil pajjiżna mhuwiex biss dak ekkleżjali, iżda hu wkoll sehem għas-solidarjetà u biex insibu ruħna flimkien”. Hekk qal il-President Mattarella huwa hu jirringrazzja lil Margaret Karram, il-President tal-Moviment tal-Fokolari għall-istedina li saritlu biex iżur iċ-Ċentru Internazzjonali tal-Moviment f’Rocca di Papa.

“Fil-kunċett ta’ ‘fokolare’, li tifforma ruħha familja”– kompla jgħid il-President “hemm sejħa kontinwa għal sens ta’ komunità, biex nagħrfu li għandna bżonn xulxin u li flimkien biss nistgħu nwettqu dak li hu pożittiv, aċċettabbli u li jġib progress. Dan hu sehem importanti ħafna għal pajjiżna”.

Il-President Mattarella kien mogħti merħba mill-President tal-Fokolari flimkien mal-Ko-president Jesús Morán, Maria Voce, l-ex-President tal-Moviment u l-Kunsill Ġenerali li jirrappreżenta l-Moviment fid-dinja kollha.

B’din iż-żjara hu xtaq jesprimi l-ġieħ lejn it-tifkira ta’ Chiara Lubich u Igino Giordani, li huma midfuna fil-kappella taċ-Ċentru. Inżerta li l-jum li fih saret din iż-żjara kien ukoll il-jum li fih il-Moviment Politiku għall-Unità kien qed ifakkar il-25 sena mit-twaqqif tiegħu. Dan il-Moviment twaqqaf minn Chiara Lubich biex kif qalet hi stess: “il-fraternità ssir kategorija politika”. Anki Papa Franġisku fakkar dan l-anniversarju waqt l-Angelus tal-Ħadd 2 ta’ Mejju u awgura lill-membri ta’ dan il-Moviment “ħidma t-tajba li tkun ta’ servizz għal politika tajba”.

Meta wasal iċ-Ċentru, il-President Mattarella ried jara l-iskultura tal-bronż tal-On. Giordani, li hi xogħol tal-artist Peter Kostner. Din l-iskultura kienet inawgurata fit-18 ta’ April li għadda fl-okkażjoni tal-41 anniversarju mill-mewt ta’ Giordani.

Fid-diskors tagħha biex issellem lill-President, Margaret Karram żguratu li l-Moviment tal-Fokolari kien ser ikompli bil-ħidma tiegħu ta’ solidarjetà, “u li kien ser ikompli jifrix din il-ħidma biex jgħin lil dawk il-ħafna persuni li ddgħajfu frott tal-kriżi sanitarja”. “Id-dinja – kompliet tgħid – l-aktar f’dawn iż-żmenijiet qed titlob aktar kondiviżjoni u l-ideal tal-unità tal-Fokolari jista’ u għandu jagħti s-sehem tiegħu għal dan”.

Fil-waqt li fakkret fil-kliem “Kun familja” li Chiara Lubich dejjem saħqet dwaru ma’ dawk li jaderixxu għall-ispiritwalità tal-unità, Margaret Karram awgurat “li l-Moviment iwettaq il-programm li tfassal għaż-żmien li qegħdin fih matul l-aħħar Assemblea Ġenerali. U dan hu li nħaddnu d-dinja, filwaqt li nisimgħu l-għajta tal-umanita, tal-ħolqien u tal-ġenerazzjonijiet ġodda”.

Fil-Quddiesa, waqt l-omelija l-ko-president Morán qal: “Il-pandemija għadha ma waqfitx taħsad vittmi umani, il-paċi qed issibha diffiċli biex tistabbelixxi rabtiet internazzjonali. Irridu nitolbu b’aktar ħerqa , iżda biex dan iseħħ hemm bżonn li l-insara jiddeċidu li jkunu fi Kristu, fl-imħabba tiegħu, billi jgħixu l-kmandament tal-imħabba lejn xulxin”.

Meta sellem lil dawk preżenti, il-President qal ukoll: “Qabel ma bdejna hawnhekk, ħaduni nara wkoll il-kappella fejn hemm dak il-mużajk daqshekk meraviljuż wara l-artal, u fejn hemm l-oqbra ta’ Chiara Lubich u Igino Giordani li kelli x-xorti li nsir nafu meta kont għadni żgħir, u ta’ Dun Foresi: tassew figuri straordinarji”.

Il-President tkellem dwar Giordani anki fl-introduzzjoni li kiteb għall-bijografija “Igino Giordani un eroe disarmato” (ta’ Alberto Lo Presti, Città Nuova Ed.) li ġiet ippublikata dan l-aħħar. Qal li x-xhieda ta’ ħajja nisranija li jagħti Giordani hi waħda li tassew għandha tispirak.

Stefania Tanesini

Source: www.focolare.org

Watch video: https://vimeo.com/544252523

Download pdf of leaflet

“Alla hu mħabba, u min jgħammar fl-imħabba jgħammar f’Alla, u Alla fih” (1 Ġw 4, 16).

“Alla hu mħabba”: din hi l-aktar definizzjoni mdawla t’Alla fl-Iskrittura li nsibuha biss darbtejn, eżattament f’din l-ittra li hi wkoll eżortazzjoni u li nisimgħuha tidwi fil-Vanġelu ta’ San Ġwann. Infatti l-awtur hu dixxiplu li jagħti xhieda tat-tradizzjoni spiritwali tal-appostlu Ġwanni. Hu qed jikteb lil komunità nisranija tal-ewwel seklu li, sfortunatament, kienet għaddejja minn tbatija kbira minħabba nuqqas ta’ qbil fil-fidi u fix-xhieda.

Alla hu mħabba: fih innifsu Hu jgħix il-milja tal-komunjoni bħala Trinità u jimla b’imħabbtu ʼl-ħlejjaq kollha. Lil dawk kollha li jilqgħuh jagħtihom is-setgħa li jsiru wlied Alla , bl-istess DNA tiegħu, jagħmilhom kapaċi jħobbu. U mħabbtu, li hi mogħtija lilna b’xejn, teħlisna minn kull biża’ u mistħija .
Iżda sabiex titwettaq il-wegħda tal-għaqda ta’ bejnietna: aħna f’Alla u Alla fina, irridu “nibqgħu” f’din l-istess imħabba, u f’kull ma nagħmlu nħobbu b’imħabba attiva u dinamika. Għalhekk id-dixxipli ta’ Ġesù huma msejħa jħobbu u jagħtu ħajjithom għal xulxin u jaqsmu ġidhom ma’ kull min jinsab fil-bżonn. B’din l-imħabba, il-komunità tibqa’ waħda magħquda, komunità profetika u fidila.

“Alla hu mħabba, u min jgħammar fl-imħabba jgħammar f’Alla, u Alla fih”.

Din hi aħbar qawwija u ċara għalina wkoll, illum, meta kultant inħossuna mgħaffġa minn ġrajjiet li qatt ma nobsruhom u li diffiċli nikkontrollawhom, bħall-pandemija jew traġedji oħra personali jew soċjali. Inħossuna mitlufa u mbeżżgħa u jagħtina li ningħalqu fina nfusna u nibnu ħitan biex nistkennu minn dak li naħsbu li jkun qed jhedded is-sigurtà tagħna. Filwaqt li aħjar nibnu pontijiet biex bihom inkunu nistgħu niltaqgħu flimkien.

Kif nistgħu nibqgħu nemmnu fl-imħabba t’Alla fi ġrajjiet bħal dawn? Nistgħu nkomplu nħobbu?
Meta Josiane, mara mil-Libanu, saret taf bl-isplużjoni tal-waħx li kien hemm fil-port ta’ Bejrut f’Awwissu tal-2020, hi reġgħet lura lejn pajjiżha. Stqarret hekk ma’ dawk li bħalha jgħixu l-Kelma tal-ħajja: “Ħassejt niket, rabja, dieqa u taħwid. Staqsejt lili nnifsi: mhux biżżejjed dak li għadda minnu l-Libanu? Bdejt naħseb fuq dawk l-inħawi li sfaw imġarrfa għal kollox, postijiet fejn kont twelidt u għext; fejn mietu qraba u ħbieb tiegħi, weġġgħu jew tilfu darhom u kellhom imorru jfittxu l-kenn x’imkien ieħor; fejn inqerdu blokki sħaħ ta’ appartamenti, skejjel u sptarijiet.

Fittixt li nkun qrib ommi u ħuti, li nwieġeb il-messaġġi ta’ dawk li wrewni l-imħabba u t-talb tagħhom; fittixt li f’din il-ġerħa miftuħa u profonda nisma’ lil kulħadd. Ridt nemmen u issa NEMMEN li kull laqgħa ma’ min qed ibati hi sejħa biex inwieġeb bl-imħabba kollha li Alla poġġa f’qalbi. Bdejt niskopri li f’ħafna Libaniżi, il-biċċa l-kbira żgħażagħ, ma kienx hemm biss id-dmugħ, imma wkoll dawl li wassalhom biex jerġgħu iqumu, iħarsu madwarhom u jgħinu ʼl min jinsab fil-bżonn. Nibtet fija t-tama li hawn żgħażagħ lesti jimpenjaw ruħhom bis-serjetà fil-politika, għax huma konvinti li s-soluzzjoni tinsab fit-triq tad-djalogu veru, u li nkunu qalb waħda, u niskopru lilna nfusna, għax b’dan il-mod aħna nkunu lkoll aħwa”.

“Alla hu mħabba, u min jgħammar fl-imħabba jgħammar f’Alla, u Alla fih”.

Chiara Lubich tagħtina suġġeriment prezzjuż biex ngħixu din il-Kelma tal-Vanġelu: “Qatt aktar ma nistgħu nifirdu s-salib mill-glorja, ma nistgħux nifirdu ʼl Ġesù Msallab mill-Irxoxt. Dawn huma żewġ aspetti tal-istess misterju t’Alla li hu Mħabba . […] Meta nagħmlu l-offerta tagħna, għandna nippruvaw ma naħsbux aktar fuqha, imma nwettqu dak li Alla jitlob minna, fil-post fejn inkunu: […] infittxu nħobbu ʼl-oħrajn, lil dawk li jgħixu qrib tagħna. Jekk nagħmlu hekk, nistgħu nħossu effett mhux tas-soltu u mhux mistenni: ruħna timtela bi sliem, b’imħabba, anki b’ferħ safi u dawl […]. U meta nimtlew b’din it-tama, inkunu nistgħu ngħinu aħjar lil ħutna biex isibu l-ferħ fin-niket, biex l-inkwiet jinbidel fi sliem. B’hekk inwasslu l-ferħ lil ħafna nies, dak il-ferħ li l-qalb ta’ kull bniedem tant hi mxennqa għalih» .

Letizia Magri

https://soundcloud.com/user-63571203/word-of-life-may-2021

Il-vaċċin kontra l-Covid-19 bħala ġid komuni dinji, it-trattat tal-Nazzjonijet Magħquda kontra l-armi nukleari, l-istrateġiji globali dwar l-immigrazzjoni, il-legalita’, l-ekonomija ċivili u l-ekoloġija integrali ser ikunu t-temi prinċipali għall-25 edizzjoni ta’ United World Week. Dan l-appuntament dinji li ż-Żgħażagħ tal-Moviment tal-Fokolari jippromwovu kull sena ser isir mill-1 sad-9 ta’ Mejju 2021 u ser ikun streamed fuq www.unitedworldproject.org.

Il-programm għal din il-ġrajja ser ikun dan li ġej:

1 ta’ Mejju
15.00: “l-Ewwel ta’ Mejju f’ Loppiano” – ġrajja ta’ kull sena li jieħdu sehem fiha eluf ta’ żgħażagħ mill-Italja u minn partijiet differenti tad-dinja.
21.00: Kunċert mill-grupp internazzjonali Gen Verde.

2 ta’ Mejju
“Run4unity” virtwali li ssir mill-11.00 sa 12.00 fit-time zones differenti dinjija: relay-race b’logħob, sfidi, esperjenzi ….. li tissimbolizza qawsalla ta’ għaqda u paċi fid-dinja.
14.00: Il-Moviment ta’ Politika għall-Unita’, li qed jiċċelebra l-25 sena tiegħu, ser iniedi “Appell għall-kwalita’ ġdida ta’ politika”

4 ta’ Mejju
17.00: “Female sport experiences”, organizzat minn Sportmeet Association.

5 ta’ Mejju
16.00: “l-Ekonomija ta’ Franġisku” – iż-żgħażagħ fi djalogu dwar l-ekonomija.

6 ta’ Mejju
19.00: Città Nuova tippreżenta “La legalità del Noi al tempo del COVID 19” (Il-legalità tal-Aħna fi żmien il-COVID 19).
Mis-7 sad-9 ta’ Mejju l-programm jilħaq il-quċċata tiegħu bil-World Forum #daretocare minn Brussels.

7 ta’ Mejju
12.00 (UTC+1): “Dare To Care International Convention” minn Brussels, programm li ser jittella’ bil-kollaborazzjoni tas-Sylvester TV Productions Company u li fih ser ikun hemm esperjenzi, ideat, ispirazzjonijiet…. dwar “dare to care” mid-dinja kollha;13.00: Iż-Żgħażagħ fi djalogu mal-President tal-Parlament Ewropew;
14.00: The Economy of Francesco, Policies & Happiness and Care’s proposals

8 ta’ Mejju
14.00: “Vaċċin għal kulħadd, ġid komuni li teħtieġu d-dinja kollha”
21.00: Kunċert mill-grupp internazzjonali Gen Rosso international performing arts group.

9 ta’ Mejju
12.00 (UTC+1): “#daretocare for People and the Planet”, programm li ser jiffoka fuq l-ekoloġija integrali u li ser iniedi t-tieni fażi tal-kampanja #daretocare.
15.00: “Care and COP26”
Fil-ġrajjiet ta’ Ġimgħa Għal Dinja Magħquda huma mistennija jieħdu sehem David Sassoli, il-President tal-Parlament Ewropew; l-ekonomisti Jeffrey Sachs, Sir Partha Dasgupta u Luigino Bruni; il-professuri dwar l-ambjent Simone Borg mill-Universta’ tal-Malta u Lorna Gold mill-Universita ta’ Maynooth, fl-Irlanda; Catherine Belzung, professur tan-neuroscience mill-Universita’ ta’Tours fi Franza; Pasquale Ferrara, diplomatiku u ambaxxatur; Giuseppe Gatti, maġistrat mid-Direttorat Nazzjonali Taljan Anti-Mafia u Anti-Terroriżmu; Margaret Karram u Jesús Morán, President and Ko-President tal-Moviment tal-Fokolari; Fr. Luigi Ciotti, fundatur ta’ Libera.

“Un eroe disarmato”: dan hu t-titlu tal-bijografija ġdida dwar Igino Giordani. Saret il-presentazzjoni tagħha l-Ħadd 18 ta’ April meta l-Moviment tal-Fokolari fakkar il-41 anniversarju tat-tluq tiegħu lejn is-sema. F’din l-okkażjoni saret intervista lil Prof. Alberto Lo Presti u Dr. Elena Merli, l-edituri ta’ din il-bijografija u membri taċ-Ċentru Igino Giordani.

F’din l-intervista ħarġu ħafna affarijiet interessanti. L-ewwel mistoqsija kienet: għalfejn inkitbet bijografija oħra dwar Giordani meta ġa nkitbu diversi oħrajn? Dr. Merli wieġbet li l-bijografiji li nkitbu qabel kollha huma ta’ valur kbir, iżda dawn jitkellmu biss fuq partijiet mill-ħajja ta’ Giordani jew inkella janalizzaw xi aspett mill-ħajja tiegħu: l-aspett storiku, l-aspett spiritwali, l-aspett politiku…. Din kienet bijografija aktar kompluta u titkellem dwar aspetti li ftit li xejn kienu jissemmew qabel, bħal: il-ħajja tiegħu fil-familja, ir-relazzjoni profonda tiegħu ma’ Chiara, iż-żmien ta’ dawl partikulari magħruf bħala “il-Ġenna tal-‘49”. Dr.Merli qalet li hemm patrimonju enormi ta’ dokumenti, ittri, recordings, li permezz tagħhom setgħu jiskopru ħafna dettalji dwar il-ħajja ta’ Giordani.

Minn din l-intervista sirna nafu li l-ewwel bijografija dwar Giordani inkitbet fl-1936. L-awtur tagħha kien Bernardo Mattarella, missier Sergio Mattarella, il-President tar-Republika Taljana li kien mitlub jikteb l-introduzzjoni għal din il-bijografija ġdida. Fl-intervista, Prof. Alberto Lo Presti qal li l-President Mattarella kien jaf lil Giordani personalment, xi ħaġa li hu stess semma’ anki fl-introduzzjoni tal-ktieb. Qal ukoll li parti minn din il-bijografija hi ddedikata għall-impenn politiku ta’ Giordani, li għamel esperjenza tal-gwerra, ta’ żmien il-faxxiżmu, ta’ qerda u tbatija soċjali. U saħaq li x-xhieda tiegħu titfa’ dawl anki fuq il-ħajja tal-lum.

Interessanti dak li wieġeb Lo Presti meta kien mistoqsi: dan il-ktieb għal min hu intenzjonat? Wieġeb: “Dan il-ktieb hu għal dawk kollha li jixtiequ (…) jkunu jafu kif wieħed jista’ jagħti lilu nnifsu b’mod sħiħ lil Alla u jibqa’ jgħix l-affarijiet ordinarji fil-ħajja tad-dinja. Dan hu li rnexxilu jagħmel Giordani”. U kompla jispjega li għalkemm Giordani studja l-kitba ta’ Missirijiet il-Knisja, ta’ diversi teoloġi u ta’ nies spiritwali magħrufa, hu sab it-tweġibiet għall-mistoqsijiet li dejjem kellu meta ltaqa’ ma’ Chiara u mal-ispiritwalita’ ta’ komunjoni.

Lejn it-tmiem ta’ din l-intervista, Lo Presti rrakkonta episodju li hu sinifikattiv ħafna. Qal li Giordani kellu xewqa kbira li jagħti lilu nnifsu lil Alla b’mod sħiħ u għalhekk lejn l-aħħar tas-snin 1920 ingħaqad mat-Terz Ordni Dumnikan. Iżda ma tantx kien sodisfatt bir-regola tagħhom; xtaq li jinvolvi ruħu aktar f’ħajja reliġjuża. Offra idea li kellu lill-patrijiet: “Nikru appartament fejn nistgħu niltaqgħu lkoll flimkien: intom il-patrijiet biċ-ċoqqa u aħna l-lajċi bil-qalziet. U hekk inkunu nistgħu ngħixu ftit ħajja komunitarja flimkien”. Dan ma seħħx għax in-normi tal-Ordni Dumnikan kienu jgħidu mod ieħor.

Temm jgħid il-Prof. Lo Presti: “Dak li l-qalb ta’ Giordani kienet tixxennaq għalih fl-aħħar tas-snin 1920, sar realta’ permezz ta’ Chiara: kien il-fokolare”.

Source: https://www.focolare.org/en/news/2021/04/19/why-another-biography-of-giordani/