Niżżel il-fuljett tal-Kelma tal-Ħajja bil-Malti
“Min irid ikun kbir fostkom, għandu jkun qaddej tagħkom, u min irid ikun l-ewwel fostkom, għandu jsir ilsir ta’ kulħadd” (Mk 10, 43-44).
Fi triqtu lejn Ġerusalemm, Ġesù beda jħejji d-dixxipli għall-passjoni u l-mewt tiegħu, iżda kienu propju dawk li mxew warajh mill-qrib li ma setgħux jifhmu dak li kien hemm lest għalih.
Anzi, l-istess appostli bdew jitlewmu bejniethom: Ġakbu u Ġwanni talbuh jagħtihom post ta’ unur “fil-glorja tiegħu”1, u kif l-għaxra l-oħra semgħu dan, saħnu għalihom u l-grupp deher mifrud. Imbagħad, bis-sabar kollu, Ġesù sejħilhom ħdejh u reġa’ fissrilhom il-messaġġ ġdid li ried iwasslilhom:
“Min irid ikun kbir fostkom, għandu jkun qaddej tagħkom, u min irid ikun l-ewwel fostkom, għandu jsir ilsir ta’ kulħadd”.
F’dan il-kliem, meħud mill-Vanġelu ta’ San Mark, toħroġ dejjem aktar il-figura tal-qaddej-ilsir. Ġesù jurina t-triq biex ma nibqgħux naqdu biss fil-grupp limitat li fih inħossuna komdi, imma biex naqdu ʹl kulħadd bla ma nħallu lil ħadd barra.
Din hi proposta ġdida li tmur kontra l-mod ta’ kif aħna l-bnedmin nifhmu x’jiġifieri l-awtorità, li forsi kienet issaħħar lill-istess appostli, u għandu mnejn issaħħar lilna wkoll.
Tgħid hawnhekk jinsab is-sigriet tal-imħabba Nisranija tagħna?
“Insibu kelma fil-Vanġelu li forsi ma tantx nagħtuha importanza: il-qadi. Naħsbu li hi xi kelma antikwata u ma tixraqx id-dinjità tal-bniedem, li għandu d-dritt jagħti u jirċievi. Madankollu, il-messaġġ tal-Vanġelu qiegħed kollu hawn. U li tħobb tfisser taqdi. Ġesù ma ġiex biex jikkmanda imma biex jaqdi. […] Il-Kristjaneżmu jfisser qadi, li naqdu lil xulxin, u min sempliċiment jagħmel dan – u din hi xi ħaġa li kulħadd jista’ jagħmilha – ikun għamel kollox. Issa dan il-‘kollox’ fih innifsu hu Kristjaneżmu ħaj, u b’hekk jibda jinbidel u jaqbad f’ħuġġieġa sħiħa”2.
“Min irid ikun kbir fostkom, għandu jkun qaddej tagħkom, u min irid ikun l-ewwel fostkom, għandu jsir ilsir ta’ kulħadd”.
Meta niltaqgħu ma’ Ġesù fil-Kelma tiegħu, għajnejna jinfetħulna. Kif ġralu Bartilmew, kif naqraw fil-versi ta’ wara3. Il-laqgħa tagħna ma’ Ġesù teħlisna mil-limiti ta’ kif naħsbuha, nibdew naraw il-kobor ta’ Alla nnifsu, il-proġett tiegħu għal “smewwiet ġodda u art ġdida”4.
L-eżempju li jagħtina l-Mulej li ħasel riġlejn l-appostli5, jeħodha kontra l-mod riġidu li ħafna drabi l-komunitajiet ċivili, u xi drabi anki dawk reliġjużi, jirriżervaw għal min jinsab fl-aħħar post tas-soċjetà.
Għalhekk, il-qadi Nisrani jfisser li nimitaw dak li għamel Ġesù, nitgħallmu minnu dan l-istil ġdid ta’ kif ngħixu fis-soċjetà tagħna: irridu ngħixu qrib kull bniedem, hi xinhi l-kundizzjoni tiegħu fis-soċjetà.
Giovanni Anziani, qassis Metodista tal-Knisja Valdese, jgħid: “[…] meta nqiegħdu l-fiduċja u t-tama tagħna kollha fil-Mulej li hu qaddej ta’ kulħadd, il-Kelma tiegħu titlob minna li nġibu ruħna fid-dinja bil-kontradizzjonijiet kollha tagħha, ta’ bnedmin li jġibu l-paċi u l-ġustizzja, bħala bennejja ta’ pontijiet għall-ftehim bejn il-ġnus”6.
Hekk għex Igino Giordani, li kien kittieb, ġurnalista, politiku u missier ta’ familja, fiż-żmien meta l-Italja kienet immexxija minn dittatur. Biex ifisser l-esperjenza tiegħu, kiteb hekk: “Il-politika hi fis-sens dinjituż u Nisrani tagħha, qaddejja u m’għandhiex tkun sid: ma tridx tkun mezz ta’ abbuż, lanqas ta’ setgħa fuq kulħadd jew xi domma. Il-funzjoni u d-dinjità tagħha għandha tkun li taqdi lis-soċjetà, li tħobb b’mod konkret. Hi l-ewwel forma ta’ mħabba lejn art twelidna”7.
Bix-xhieda li Ġesù tana f’ħajtu, hu jistedinna nagħmlu għażla ħielsa: li ma ngħixux aktar magħluqin fina nfusna u ħsiebna biss fl-interessi tagħna, imma li ngħixu għall-oħrajn, u li nġorru fuqna kulma jtaqqalhom, u hekk il-ferħ jinqasam bejn kulħadd.
Ilkoll kemm aħna għandna xi responsabiltà żgħira jew kbira, jew xi setgħa fuq l-oħrajn: fil-politika jew fis-soċjetà, kif ukoll fil-familja, l-iskola, fil-komunità ta’ dawk li jemmnu. Ejjew naħtfu l-okkażjoni ta’ dawn il-“postijiet ta’ unur” li għandna biex naqdu u nibnu rabtiet ġusti bejn kulħadd.
Letizia Magri u t-team tal-Kelma tal-Ħajja
Ritratt: @Pixabay
- Ara Mk 10, 37.
- C. Lubich, Servire, rivista «Città Nuova» 17 (1973/12), pġ. 13.
- Ara Mk 10, 46-52.
- Ara Is 65, 17 u 66, 22, kif ukoll 2 Pt 3, 13.
- Ara Ġw 13, 14.
- https://www.chiesavaldese.org/aria_covers.php?ref=111
- P. Mazzola, Perle di Igino Giordani, Effatà editrice, Torino 2019, pġ. 112
Be the first to comment