Fi żmien meta l-umanità hi mhedda mill-vjolenza li dejjem qed tikber u minn ħafna qtigħ il-qalb, dan il-Patt jista’ jnissel tama ġdida.

Is-16 ta’ Lulju hi ġurnata sinifikattiva għall-Moviment tal-Fokolari. F’dan il-jum, il-Moviment ifakkar il-Patt tal-Unità bejn Chiara Lubich, il-fundatriċi u Igino Giordani, li hi kienet tikkunsidrah bħala ko-fundatur. Il-Patt tal-Unità sar fis-16 ta’ Lulju 1949.

F’din l-okkażjoni, Margaret Karram, il-President tal-Moviment tal-Fokolari bagħtet messaġġ lil dawk kollha fid-dinja li jagħmlu parti mill-Moviment.

Lil dawk kollha fid-dinja li jagħmlu parti mill-Moviment tal-Fokolari.

Għeżież,

Anki din is-sena, qed infakkru s-16 ta’ Lulju, l-anniversarju tal-Patt tal-Unità bejn Chiara u Foco ( Igino Giordani) fi żmien meta l-umanità hi mhedda mill-vjolenza li dejjem qed tikber u minn ħafna qtigħ il-qalb. Tlabna ħafna biex il-paċi tfittex tasal, imma f’bosta pajjiżi għad hemm ħafna tbatija minħabba l-gwerer li għadhom għaddejjin.

B’danakollu, qalbi tgħidli li dan il-jum, li jfisser ħafna għall-Moviment, jista’ jnissel fina tama ġdida. Kien dan il-Patt li ta bidu għall-esperjenza mistika tal-Paradiso’49, fejn Alla wera lil Chiara anki s-sehem li l-Opra, li kienet qed titwieled, segħtet toffri lill-umanità permezz tal-ispiritwalità tal-unità .

Għalhekk inħoss f’qalbi li kull wieħed minna għandu responsabbiltà kbira: li ninkarnaw dan il-Patt sublimi fil-ħajja tagħna ta’ kuljum sabiex “nirrakkmaw disinji ta’ dawl fuq il-folla, u fl-istess ħin naqsmu mal-proxxmu l-uġigħ, il-ġuħ, it-tbatijiet, il-mumenti qosra ta’ ferħ” .

Waqt li qegħdin fis-sena meta għadna qed napprofondixxu t-tema tal-“qrubija” u ngħixu l-Ġublew tat-Tama, ejjew nieħdu l-okkażjoni biex niftħu l-bibien ta’ qlubna beraħ għal kull wieħed u waħda minn ħutna ħalli tikber il-komunjoni u nġeddu l-ħajja fil-komunitajiet tagħna.

Hekk, ir-rabiet tagħna, kemm individwalment kif ukoll bħala gruppi, jirriflettu dejjem aktar l-istedina li l-appostlu Pawlu għamel lir-Rumani: “Ħobbu lil xulxin bħal aħwa, fittxu li tistmaw lil xulxin” ( Rum 12,10).

Huwa propju dan li jwassalna biex ngħixu dak “ix-xejn ta’ mħabba” li fuqu hu mibni l-Patt. Jiena ċerta li dan iġib frott ta’ paċi fina, fl-Opra u fid-dinja.

U din tkun l-aħjar tħejjija għall-Assemblea Ġenerali tal-Moviment tal-Fokolari li ser issir f’Marzu 2026 u li tgħinna biex niddixxernu t-triqat li rridu nimxu fihom fil-futur qarib.

Awguri lil kulħadd u l-festa t-tajba tal-Patt!

Margaret Karram

Traduzzjoni ta’ Vivienne Attard

Din is-sena qed niċċelebraw il-75 sena tal-Patt bejn Chiara u Igino Giordani. Dan il-Patt tant hu prezzjuż li qatt ma nistgħu naslu biex nifhmu x’ifisser b’mod sħiħ u nwettquh.

F’dan il video huma stess  jirrakkuntaw l-esperjenza profonda tagħhom tas-16 ta’ Lulju ’49

Jekk tieħu f’idejk il-ktieb “Ngħixu l-Kelma” tiskopri li l-Kelma hi għajn ta’ barka, issaħħaħ il-fidi, timla bit-tama, tkattar il-ferħ (…). Kif jgħid Papa Franġisku: “Il-Kelma turina min hu Alla, twassalna għand il-bniedem, tinfed ir-ruħ tagħna, tfarraġna u fl-istess ħin tqanqalna biex naġixxu u nersqu lejn il-ġrieħi tal-umanità.”

Dan il-ktieb hu publikazzjoni oħra bil-Malti li l-Moviment tal-Fokolari nieda fit-18 ta’ Novembru li għadda. Fih ġabra ta’ 100 Kelma tal-Ħajja, traduzzjonijiet ta’ kitba bit-Taljan li ħarġet mill-pinna ta’ Chiara Lubich, il-fundatrici tal-Fokolari.

Forsi tistaqsi: il-Kelma tal-Ħajja xinhi? It-tweġiba  għal din il-mistoqsija teħdok lura lejn l-ewwel żmenijiet tal-Moviment meta Chiara Lubich u sħabha kienu qed jgħixu l-kruha u l-qerda tat-tieni gwerra dinjija. Spiss kien ikollhom imorru jfittxu l-kenn fix-xelters u kienu jieħdu magħhom il-ktieb ċkejken tal-Vanġelu. Fid-dawl tax-xemgħa, kienu jiftħu paġna mill-Vanġelu u jaqrawha.

U bil-mod il-mod  bdew jiskopru  l-valur ta’ dak il-kliem li għandu l-qawwa  ġġib bidla mhux biss fl-individwu imma wkoll fis-soċjeta’. Il-kliem tal-Vanġelu beda jsir kodiċi ta’ ħajja għall-komunita’ li kienet qiegħda titwieled; u allura, mhux biss  jaqrawh imma jgħixuh. Chiara bdiet tieħu silta mill-Vanġelu u  tikteb kumment dwarha biex min jaqra s-silta jkun jista’ jidħol aktar fil-fond tal-Kelma u jgħixha. Hekk bdiet  il-Kelma tal-Ħajja!

Mill-1943 sal-1978 hi kitbet diversi ħsibijiet u kummenti fuq siltiet mill-Kotba Mqaddsa,  imma kien fl-1978, meta ċirkostanzi importanti fl-Italja xprunawha biex tikteb hi regolarment il-Kelma tal-Ħajja ta’ kull xahar. Il-Kelma tal-Ħajja hi parti mill-ħajja tal-Moviment u  għadha sallum tasal għand miljuni ta’ nies fid-dinja kollha  b’mezzi diversi.

Mill-1978 sakemm waslet biex mietet,  Chiara kitbet  madwar 350 Kelma tal-Ħajja li 100 minnhom jinsabu fil-ktieb Ngħixu l-Kelma. Ma kienx faċli tasal għall-għażla ta’ 100 Kelma tal-Ħajja  meta għandek f’idejk il-Kelma t’Alla b’kummenti siewja li joffru proposti konkreti u jittrażmettu konvinzjoni u tama.

Id-daħla għal dan il-ktieb saret mill-Eċċ. Tiegħu Mons Arċisqof Charles J. Scicluna, fil-waqt Mons Charles Cordina  jagħti l-esperjenza personali tiegħu dwar l-għajxien tal-Kelma. Hemm ukoll kitba li tagħti ħjiel dwar il-Kelma t’Alla fil-ħajja ta’ Chiara u tal-Moviment tal-Fokolari u xi ftit esperjenzi qosra, xhieda li l-għajxien tal-Kelma jibni l-komunita’.

F’Ngħixu l-Kelma wieħed isib ftit mill-wirt spiritwali kbir li ħalliet Chiara Lubich, u jiskopri  dik il-ħarsa profonda ispirata mill-Vanġelu, li titfa’ dawl fuq diversi aspetti tal-ħajja umana. Fil-waqt li joffri kontenut għal riflessjoni u meditazzjoni, il-ktieb iwassal lill-qarrej biex jiskopri jew jiskopri mill-ġdid li l-messaġġ tal-Vanġelu hu għal kulħadd u li fih hemm dawk il-valuri essenzjali li l-qalb tal-bniedem tixxennaq għalihom u d-dinja tagħna tant teħtieġhom.

Vivienne Attard

Ġabra ta’ 100 Kelma tal-Ħajja, meħuda minn madwar 350 li Chiara Lubich, il-Fundatriċi tal-Moviment tal-Fokolari, kitbet bejn l-1943 u l-2008. Il Kelma tal-Ħajja tġgi ppublikata f’iktar min 96 lingwa, fosthom anke bil-Malti.
© Moviment tal-Fokolari, Malta
© Fondazzjoni Dinja Magħquda – Moviment tal-Fokolari (Malta)
ISBN: 978-9918-0-0656-4
Prezz: €10

Dan il-ktieb jista’ jinxtara mingħand Emmaus Bookshop, Triq S. Sommier, Birkirkara, BKR 4611, Malta. Tel. 2149 8343, email: info@emmausmalta.com

U anki miċ-Ċentru tal-Moviment tal-Fokolari, Tel. 21385801, email: focolare.malta@outlook.com

Fl-okkażjoni tat-80 sena, mit-twaqqif tal Moviment tal-Fokolari, fis-7 ta’ Diċembru  2023, Papa Franġisku laqa’ f’udjenza privata lil Margaret Karram, President tal-Moviment tal-Fokolari, lil Jesús Morán, Ko-President, u lill-membri tal-Kunsill Ġenerali u lil dawk responsabbli tal-Moviment  fiż-żoni tad-dinja. Dan li ġej hu d-diskors li għamel il-Papa waqt din l-udjenza.

 Għeżież ħuti,

Insellem lill-Kardinal Farrell, lill-president tagħkom Dr. Margaret Karram, lill-ko-president Jesús Morán, lill-membri tal-Kunsill Ġenerali, lid-delegati fiż-żoni u lilkom ilkoll. Grazzi li qegħdin hawn illum, fil-ġurnata li fiha qed tiċċelebraw għeluq it-80 sena mit-twaqqif tal-Moviment tal-Fokolari, li hu magħruf ukoll bħala l-Opra ta’ Marija.

Nirringrazzjakom!

Il-Moviment twaqqaf f’dak il-jum li fih is-Serva t’Alla, Chiara Lubich iddeċidiet li tikkonsagra ruħha lil Alla b’mod sħiħ. Is-sejħa biex tagħti lilha nnifisha lil Alla b’mod radikali twieldet minn ispirazzjoni li hi rċiviet fil-ħajja ordinarja ta’ kuljum – waqt li kienet qed tagħmel qadja għall-familja – u hi wieġbet għal din is-sejħa ħelwa u qawwija li ħasset f’qalbha. Kien is-7 ta’ Diċembru 1943, fi Trento, meta l-gwerra kienet fl-aqwa tagħha, u kien lejlet is-Solennita’ tal-Immakulata Konċezzjoni, meta l-“iva” ta’ Marija saret l-“iva” ta’ Chiara. U minnha twieldet mewġa ta’ spiritwalita’ li nfirxet mad-dinja kollha biex tgħid  lil kulħadd kemm hi ħaġa sabiħa li wieħed jgħix il-Vanġelu b’kelma waħda u sempliċi: unita’. Imma unita’ tfisser ukoll armonija: unita’ armonjuża.

F’dawn it-tmenin sena, intom wassaltu dan il-messaġġ biex jidwi fost żgħażagħ, komunitajiet, famijli, reliġjużi, saċerdoti, isqfijiet; u anki f’oqsma soċjali differenti: mill-qasam tal-edukazzjoni sa dak tal-ekonomija,  mid-dinja tal-arti u l-kultura sa dik tal-informazzjoni u l-media; u b’mod partikulari fil-qasam tal-ekumeniżmu u tad-djalogu interreliġjuż. Kontu strument attiv li permezz tiegħu nibtu ħidmiet, inizjattivi, proġetti, u fuq kollox biex “ welled mill-ġdid” konverżjonijiet, vokazzjonijiet, ħajja mogħtija għal Kristu u għal ħutna l-bnedmin. Illum irroddu hajr lil Alla għal dan kollu.

Fi Frar 2021, meta ndirizzajt lill-Assemblea Ġenerali tagħkom, kont sħaqt fuq tlett punti  importanti għall-mixja tagħkom: li tgħixu l-kariżma b’fedelta’ dinamika; li tilqgħu l-mumenti ta’ kriżi bħala opportunitajiet biex timmaturaw u li tinkarnaw l-ispiritwalita’ b’koerenza u realiżmu. Li tgħixu l-ispiritwalita’.

Illum irrid nerġa’ nfakkarkom f’dawn il-punti biex inħeġġiġkom tgħixuhom u tippromovuhom fuq dawn it-tlett linji: maturita’  ekkleżjali,  fedelta’ lejn il-kariżma u impenn għall-paċi.

Maturita’ ekkleżjali. Nistedinkom taħdmu biex il-ħolma ta’ Knisja sinodali u missjunarja sseħħ dejjem aktar b’mod sħiħ. Ibdew mill-komunitajiet tagħkom billi taraw li jkun hemm parteċipazzjoni u ko-responsabbilta’, anki fuq livell ta’ governanza.

Araw li l-“fokolari” jissaħħu minn ġewwa u li jxerrdu dik il-klima ta’ smigħ reċiproku u sħana tal-familja fejn ikun hemm rispett reċiproku u fejn wieħed jieħu ħsieb tal-ieħor,  speċjalment fejn ikun hemm dawk l-aktar dgħajfa u li jeħtieġu sostenn. Biex twettqu dan, jiswa li timxu fit-triqat ta’ parteċipazzjoni u konsultazzjoni reċiproka fil-livelli kollha, u li tagħtu attenzjoni speċjali lill-komunikazzjoni u lid-djalogu sinċier.

Dwar dak li għandu x’jaqsam mat-tieni punt – fedelta’ lejn il-kariżma – infakkarkom fil- kliem tal-Fundatriċi tagħkom : “Lil min jiġi warajk, ħallilu biss il-Vanġelu.  Jekk tagħmel dan, l-ideal tal-unita’ jibqa’ […]. Il-Vanġelu jibqa’ u jibqa’ għal dejjem għax iż-żmien ma jagħmilx bih.” (C. Lubich,  La Parola di Dio, Rome 2011, 112-113). Jekk jogħġobkom iżirgħu l-unita’ billi twasslu l-Vanġelu, u tħallux li l-opra tal-inkarnazzjoni taħrab minn taħt għajnejkom għax Alla jrid ikompli jwettaqha fina u madwarna permezz tal-Ispirtu tiegħu, biex Ġesu’ jkun l-aħbar it-tajba għal kulħadd, bla ma jitħalla barra ħadd, u biex “lkoll ikunu ħaġa waħda” (Ġw 17:21).

U hekk niġu għat-tielet punt li hu ta’ importanza kbira għal-lum: l-impenn għall-paċi. Wara elfejn sena ta’ Kristjaneżmu, ix-xewqa  qawwija għall-għaqda  għadha  qed tieħu l-forma ta’ karba kbira f’ħafna partijiet tad-dinja, u din il-karba titlob tweġiba. Chiara ħasset din ix-xenqa meta kienet qed tgħix it-traġedja tat-tieni gwerra dinjija, u ddeċidiet li tagħti ħajjitha  biex ikun jista’ jseħħ “it-testment ta’ Ġesu”. Sfortunatament, illum d-dinja għadha mifnija bil-ġlied u għad għandha bżonn tal-bennejja tal-għaqda u l-paċi bejn bnedmin u nazzjonijiet.

Chiara qalet: “L-iskop ġenerali tal-Opra ta’ Marija hu li tkun imħabba u li xxerred l-imħabba” (Vġili tal-Pentekoste, Pjazza San Pietru 30/5/1998). Mela, dan hu l-iskop tagħkom: li tkunu mħabba u li xxerrdu l-imħabba. U aħna nafu li l-frott tal-paċi jitnissel biss mill-imħabba. Għalhekk, nitlobkom li tkunu xhieda u bennejja ta’ dik il-paċi li Kristu wettaq bis-salib tiegħu,  u li permezz tagħha rebaħ fuq il-mibegħda. Aħsbu ftit: mit-tieni gwerra dinjija ‘l hawn, il-gwerer ma waqfux. U aħna m’aħniex konxji mit-traġedja tal-gwerra.

Nixtieq naqsam magħkom xi ħaġa: meta fl-2014 mort Redipuglia għaċ-ċentinarju tal-Ewwel Gwerra Dinjija, u rajt dak iċ-ċimiterju, bkejt fuq li bkejt. Rajt il-qerda li ġġib magħha l-gwerra.. Kull 2 ta’ Novembru mmur niċċelebra f’xi ċimiterju; l-aħħar darba mort fiċ-ċimiterju tal-Commonwealth u bdejt nara l-etajiet tas-suldati- 22, 24, 18, 30 … kollha ħajjiet li ntemmu bil-gwerra. U l-gwerra għadha sejra, u kulħadd joħroġ tellief. Joħorġu rebbieħa biss dawk li jipproduċu l-armi. Li kieku jiefqu għal sena milli jipproduċu l-armi, kieku l-ġuħ fid-dinja jista’ jiġi fi tmiemu. Terribbli din il-ħaġa. Hemm bżonn naħsbu fuqha din it-traġedja.

Qabel ma nispiċċa, nixtieq nagħmlilkom l-aħħar stedina, li tgħodd ħafna għal dan iż-żmien tal-Avvent: din hi li tishru, li toqogħdu għassa. In-nassa tal-mondanita’ spiritwali dejjem tibqa’ hemm. Għalhekk, intom ukoll tridu toqogħdu attenti biex taġixxu b’mod deċiżiv, koerenti u realistiku. Ejjew niftakru li n-nuqqas ta’ koerenza bejn dak li ngħidu li aħna  u dak li aħna tassew hi l-agħar xhieda li nistgħu nagħtu. In-nuqqas ta’ koerenza.

Jekk jogħġobkom, oqogħdu attenti. U r-rimedju hu li dejjem nerġgħu mmorru għall-Vanġelu; fih hemm l-għeruq tal-fidi tagħna u tal-istorja tagħna: il-Vanġelu tal-umilta’, ta’ servizz mogħti bla ma tistenna xejn, ta’ sempliċita’.

Jien dejjem nieħu gost niftakar li intom qrib ħafna tas-sigriet t’Alla, l-erba’ sigrieti t’Alla. Hemm erba’ affarijiet li Alla ma jirnexxilux jifhimhom: ma jafx kemm hemm kongregazzjonijiet tar-reliġjużi nisa; ma jafx x’inhu l-ħsieb tal-Ġiżwiti; ma jafx kemm għandhom flus is-Salesjani, u ma jafx għajfejn jidħku l-fokolarini!

Għeżież ħuti, kif ġa għidna, intom l-Opra ta’ Marija; kienet Marija li akkumpanjatkom matul dawn it-80 sena, u intom tafu li hi żgur qatt ma tieqaf tagħmel dan. Jalla l-Verġni ta’ Nażaret tibqa’ tkun l-għajn tal-faraġ u l-qawwa tagħkom biex intom tkunu appostli tal-unita’ waqt li tkunu ta’ servizz għall-Knisja u għall-umanita’. Grazzi għal dak li intom u għal dak li tagħmlu! Komplu l-mixja tagħkom b’fiduċja. Inberikkom b’qalbi kollha u jekk jogħġobkom tinsewx titolbu għalija.  Grazzi.

Papa Franġisku

Sors: www.vatican.va

Traduzzjoni: Vivienne Attard

Fis-7 ta’ Diċembru, Papa Franġisku ser jilqa’ f’udjenza lil Margaret Karram, President tal-Moviment tal-Fokolari u lil  dawk responsabbili tal-Moviment fid-dinja kollha. Dakinhar fis-6-00pm ser issir ċelebrazzjoni Ewkaristika fil-Bażilika ta’ Santa Maria Maggiore li ser tkun immexxija mill-Eċċellenza  tiegħu, il-Kardinal  Kevin Joseph Farrell, Prefett tad-Dikasteru għal Lajċi, Familja u Ħajja.

Is-7 ta’ Diċembru 1943 hi meqjusa bħala d-data uffiċjali tat-twelid tal-Moviment tal-Fokolari. Kien f’din il-ġurnata meta Chiara Lubich ikkonsagrat ruħha lil Alla għal dejjem. 80 sena ilu, waqt li t-tieni gwerra dinjija kienet fl-aqwa tagħha, twieldet komunita’ żgħira li riedet tagħti s-sehem tagħha biex mill-ġdid issaltan  il-paċi u l-għaqda fid-dinja. Din il-komunita’ malajr bdiet tinfirex, u twieldet waħda mill-Kariżmi Ġodda fil-Knisja. L-Ispiritwalita’ tal-Moviment tal-Fokolari hi mibnija fuq l-Evanġelju, u fil-qalba tagħha nsibu b’mod partikulari t-talba ta’ Ġesu’: “Ħa jkunu lkoll ħaġa waħda” (Ġw 17:21).

Illum il-Moviment jinsab f’182 nazzjoni, sinjal tal-universalita’ u tal-ħtieġa kbira għall-għaqda u għall-fraternita’ fiż-żmenijiet traġiċi u ta’ firda li qed ngħixu fihom. Iħaddan fih Insara minn Knejjes differenti, nies ta’ bosta reliġjonijiet u oħrajn li m’għandhom ebda twemmin reliġjuż.

Fis 7 ta’ Diċembru, Papa Franġisku ser jilqa’ f’udjenza lil Margaret Karram, President tal-Moviment tal-Fokolari, lil Jesús Morán, Ko-President u lil dawk il-membri li huma responsabbli fiċ-Ċentru u fiż-żoni. Il-President qalet: “Tassew hu rigal kbir  għalina li l-Papa ser jilqagħna għandu nhar il-Ħamis 7 ta’ Diċembru 2023, propju fil-ġurnata li fiha nfakkru dik l-ewwel ‘iva’ li Chiara Lubich qalet lil Alla. Dan hu rigal li ma konniex qed nistennewh!

Nixtiequ li nwasslu lill-Papa l-imħabba u l-għożża ta’ eluf ta’ nies mid-dinja kollha li jgħixu l-kariżma tal-unita’. U nġeddu l-impenn tagħna ta’ servizz fil-Knisja f’dan il-vjaġġ sinodali, flimkien ma’ ħafna oħrajn li jridu jagħtu s-sehem tagħhom għall-paċi u għall-imħabba biex jonqos il-piż ta’ tant ġrieħi li qed itaqqlu lill-bnedmin.”

F’dik l-istess ġurnata, fis- 6 .00 p m. ser issir Quddiesa ta’ radd il-hajr għat-80 sena tal-ħajja tal-Moviment. Ser issir fil-Bażilika ta’ Santa Maria Maggiore u ser tkun immexxija mill-Kardinal Kevin Joseph Farrell, Prefett għad-Dikasteru għal-Lajċi, Familja u Ħajja.  Ser jieħdu sehem bosta  kardinali, isqfijiet u saċerdoti oħra.

Margaret Karram żiedet tgħid: ”F’din il-ġurnata jintemm il-pellegrinaġġ li qed nagħmlu  f’diversi postijiet sagri u sinifikattivi, f’Assisi, Loreto u Ruma biex nroddu ħajr, nitolbu maħfra u nibdew mill-ġdid b’kuraġġ u tama.

Il-komunitajiet tal-Fokolari  mifruxa mad-dinja kollha jixtiequ  jgħixu dan l-anniversarju bl-istess spirtu u bl-istess skop, biex hekk ikunu “xhieda ta’ dik l-imħabba tal-aħwa li tfittex li tkun qrib ta’ kulħadd,  tegħleb il-firdiet u  tasal f’ kull sitwazzjoni umana.” (1)

Stefania Tanesini

(1) Papa Franġisku lill-Assemblea Ġenerali tal-Moviment tal-Fokolari, 6 ta’ Frar 2021

Sors: Sit internazzjonali tal-Moviment tal-Fokolari

Traduzzjoni: Vivienne Attard

From the telephone Linkup with Focolare communities around the world – Palermo, Italy, 22 January 1998.

Copyright 2022 © CSC Audiovisuals – All rights reserved. (2661M)

Silta minn diskors ta’ Chiara Lubich fil-Kungress internazzjonali tal-artisti, Ruma, 23 ta’ April 1999

Darba, jiena u għaddejja bil-karozza, ridt nisma’ l-Ave Maria ta’ Gounod. Daqqewha b’ħila kbira u dak il-ħin ġieni f’moħħi bħal velu fin ħafna, li partijiet minnu kienu miksija bir-rakkmu u magħmul b’ħila delikata ħafna. Jiena u nismagħha ħassejt l-ispirtu tiegħi jintrefa’ ʹl fuq, hekk li dak il-ħin ħassejtni ningħaqad m’Alla u permezz tiegħU ma’ Marija, għax Gounod rnexxielu jfaħħarha b’mod mill-aktar fin.

Dakinhar kienet il-festa tal-Maternità divina u jien bdejt inħares mistagħġba lejHa li Hi “ta’ sbuħija hekk kbira li ma jistax jitfisser bil-kliem”. Ħsibt li ladarba Alla immaġinaha bħala Ommu f’Ġesù, il-Verb magħmul bniedem, tlellix tal-Missier, xi grad ta’ sbuħija setgħet qatt laħqet Marija? Dan ma kellix ħila nimmaġinah!

U kellimtha fuq il-wasla tiegħi għandha, forsi f’jum mhux ʹil bogħod. U ħassejt li l-preżenza tagħha, fija u madwari, kienet qed twarrab b’deċiżjoni dak kollu li jiena għadni marbut miegħu f’din id-dinja, anki jekk sabiħ u tajjeb.

Infatti, kien biżżejjed noqgħod naħseb fuqHa u fuq sbuħitHa biex nistampa f’qalbi bħal siġill: “Mulej, m’għandix ġid ieħor ħliefek”.

U fhimt li dawk il-virtujiet, li kuljum nitlobha tgħallimni, u li huma meħtieġa biex kliem bħal jitwettaq, Hi bdiet tagħtihomli, mhux bħala lista miktuba, mhux billi tfissirhomli, mhux billi tħeġġiġni ngħixhom, imma billi turini lilHa nfisHa.

Iva, hi s-sbuħija, li tagħha Marija hi eżempju divin, li għad issalva d-dinja. U dan kollu fhimtu jiena u nisma’ mużika li kienet biċċa xogħol magħmula b’arti.

Chiara Lubich

Author Maurizio Gentilini

This biography aims at presenting Chiara Lubich’s life and work from a ‘historical’ perspective, offering the reader a rich and well-documented development of facts, situations and experiences.

Description

Chiara Lubich (1920–2008) is considered one of the most significant leaders in ecumenical, interreligious and intercultural dialogue. Because of her lifelong commitment to build bridges among individuals, generations and nations, she received numerous awards, including the Templeton Prize for Progress in Religion (London 1977), the UNESCO Prize for Peace Education (Paris 1996) and the Human Rights Award of the Council of Europe (Strasbourg 1998).

This biography aims at presenting her life and work from a ‘historical’ perspective. For this reason she is presented within the framework of historical events that have occurred in her life and in the geographical setting of the places and contexts in which she travelled, from her birth up to her death in 2008.

The author presents a woman who, often unconsciously, shows a deep perception of the ‘signs of the times’ of Christianity and of the contemporary world, expressing them through her thoughts and actions, publications and works, giving rise in a relatively short time to the Focolare Movement spread throughout the world.

The book is divided into four parts, each of which offers the reader a rich and well-documented development of facts, situations and experiences. It is a captivating succession of ‘lights and shadows’, typical of a journey reserved for people who, in the history of humanity – and in particular in the history of the Church – leave an imprint on the times in which they lived.

The publication of this book hopes to make Chiara known from an unusual angle, so far never explored, but nevertheless important. It is the perspective of the twentieth century, which closes the second millennium, a century that, to its credit, counts an innumerable series of great personalities who have marked this important epochal passage with their life and their thought.

Available from New City (UK)

Fil-Ġimgħa Mqaddsa tas-sena 2000, Chiara Lubich kitbet:

“Kull sena, fil-Ġimgħa Mqaddsa, inħossuna milquta minn atmosfera speċjali. Din is-sena, f’għeluq l-elfejn sena mit-twelid ta’ Ġesu’, dawn il-jiem jakkwistaw qawwa ġdida. Fihom naraw aktar minn qatt qabel, l-Imħabba ta’ Ġesu’ għalina. Dak kollu li nfakkru f’dawn il-jiem huwa mħabba.

ĦAMIS IX-XIRKA
Is-saċerdozju hu mħabba għax hu qadi u allura mħabba konkreta.
L-Ewkaristija hi mħabba għax fiha Ġesu’ jagħtina lilu nnifsu.
L-Unita’ hi mħabba. Kien bħal-lum meta Ġesu’ talab lill-Missier: “Ħa jkunu lkoll ħaġa waħda ….”.
Hu mħabba l-kmand ta’ Ġesu’:“Ħobbu lil xulxin bħalma ħabbejtkom jien”. Ġesu’ tana dan il-kmand ġurnata qabel ma miet.

Ma nistgħux inħallu dan il-jum jgħaddi bla ma ninġabru għal ftit tal-ħin u ngħidu lil Ġesu’ li aħna lesti li ngħixu dan il-kmand li hu sejjaħlu “tiegħu” u “ġdid”. Fih tidwi l-ħajja tat-Trinita’. Skoprejnieh waqt li t-tieni gwerra dinjija kienet fl-aqwa tagħha. U rajna lil Ġesu’ bħal emigrant divin: telaq is-Sema u ġie jgħammar fostna, u għex il-ħajja li ngħixu aħna. Kien tarbija, kiber u sar iben eżemplari, raġel u ħaddiem, iżda Hu ġab miegħu l-għajxien tas-Sema pajjiżu u ried li l-bnedmin u l-affarijiet jingħaqdu f’ordni ġdid, skont il-liġi tas-sema: il-liġi tal-imħabba.

IL-ĠIMGĦA L-KBIRA
Bil-mewt tiegħu fuq is-Salib, Ġesu’ tana lezzjoni divina u erojka fuq l-imħabba. Hu kien ta kollox. Għex ħajja ta’ tbatija u ubbidjenza qrib ta’ Marija. Dam tliet snin jippriedka u jwassal il-Verita’, jixhed għall-Missier, iwiegħed l-Ispirtu s-Santu u jagħmel kull xorta ta’ mirakli ta’ mħabba. Dam tliet sigħat fuq is-salib mnejn ħafer lil dawk li qatluh, fetaħ il-bieb tal-ġenna għall-ħalliel it-tajjeb, tana lil Ommu u fl-aħħarnett tana Ġismu u Demmu, wara li kien ġa tahomlna b’mod mistiku fl-Ewkaristija. Kien għad fadallu biss id-divinita’ tiegħu.

L-għaqda tiegħu mal-Missier (…) tagħtu setgħa fuq din l-art u dinjita’ rjali fuq is-salib, imma dan is-sentiment tal-preżenza ta’ Alla kellu jinżel fil-fond tar-ruħ tiegħu u ma jibqax jħossu aktar. B’xi mod ħassu mifrud minn Dak li dwaru kien qal: “Jien u l-Missier ħaġa waħda” (Ġw. 10, 30). Fih l-imħabba xxejnet, id-dawl intefa, l-għerf siket.

Xejjen lilu nnifsu għalina biex aħna nieħdu sehem f’dak li hu Kollox: dudu tal-art (Salm 22, 7) biex jagħmel lilna wlied Alla.

Konna mifruda mill-Missier. Kien meħtieġ li l-Iben, li fih aħna lkoll konna rappreżentati, iġarrab il-firda mill-Missier; iħoss l-abbandun minn Alla biex aħna ma nkunu qatt aktar abbandunati.

Hu għallem li ħadd m’għandu mħabba akbar minn dik ta’ min jagħti ħajtu għal ħbiebu. Hu, li hu l-Ħajja, ta lilu nnifsu b’mod sħiħ. Kienet il-quċċata tal-imħabba, l-isbaħ espressjoni tagħha.

“Ħobbu lil xulxin bħal ma ħabbejtkom jien”. Nagħtu ħajjitna għal xulxin: dan għandu jkun il-kejl tal-imħabba tagħna; dan hu s-sigriet biex Ġesu’ Rxoxt ikun dejjem fostna.

Meta qrajna dan il-kliem ta’ Ġesu’ fix-xelters ta’ Trento, fihmna li huma l-qalba tal-Vanġelu, u flimkien mal-ewwel ħbieb tiegħi għamilna patt. Għidna lil xulxin:“Jien lesta li nagħti ħajti għalik”. Kull waħda minna kienet lesta li tagħti ħajjitha għall-oħrajn, u l-ġid spiritwali u materjali li kellna saru ta’ kulħadd. Ħajjitna għamlet qabża ta’ kwalita’, u għall-ewwel darba ħassejna paċi u dawl li qatt ma konna ħassejna bħalhom qabel (…), u ferħ ġdid, rari, li ma jispiċċa qatt. Kif wiegħed hu stess, Ġesu’ Rxoxt kien preżenti spiritwalment fostna magħqudin f’ismu (ara Mt. 18, 20).

Id-dinja hi għatxana għal Ġesu’. (…) Hemm bżonn li tiltaqa’ ma’ min mhux biss jemmen u jħobb b’xi mod, imma ma’ jagħti xhieda awtentika u jgħid: “Rajtu!” kif Marija Maddalena qalet lill-appostli wara li ratu ħdejn il-qabar. Iva, aħna skoprejnieh fid-dawl li bih dawwalna; missejnieh fil-paċi li nissel fina; smajna leħnu fil-fond qalbna; gawdejna l-ferħ veru tiegħu. (…)

Mela, ejjew inħobbu lil xulxin b’mod li aħna wkoll inkunu nistgħu nagħtu xhieda u ngħidu: “Rajtu, ħassejtu!”.

An engaging Italian film about Chiara Lubich (1920-2008), “Chiara Lubich: Love Conquers All” tells the story of Lubich, the founder of the Focolare Movement. The young teacher’s life in Trent, Italy, suddenly changes when Allied forces drop bombs on her city. Amid the violence of the Second World War, Chiara hears God’s call to become a lay consecrated woman — something unheard of at that time. Through the study of Scripture, Chiara realizes that she must become the hands and feet for Christ to help the poor and rebuild people’s faith in humanity. However, she doesn’t achieve her calling without resistance and suffering.

Product Overview

Price: $19.95 (in Italian with English subtitles, or an English dubbed track)

Available from: ignatius.com