[:mt]
Familja li tagħmel parti mill-Moviment tal-Fokolari f’Malta kienet qed tħejji ruħha biex tieħu sehem fil-Mariapoli 2020 li saret bejn is-6 u 8 ta’ Marzu. Iżda waslet telefonata li kienu ilhom xhur jistennewha u minflok telqu lejn l-Indja. L-imħallef f’Qorti tal-Indja xtaq jiltaqa’ magħhom għax kellhom ċans kbir li jaddottaw it-tieni wild. Johann, Nicolette u Leah Mae ippakjaw malajr sabiex imorru jiltaqgħu maċ-ċkejkna Francesca.
Kien propju fis-7 ta’ Marzu, waqt il-quddiesa fit-tieni jum tal-Mariapoli meta rċevejna l-aħbar sabiħa li l-imħallef aċċetta li l-familja Borġ Vassallo jsiru familja ta’ erbgħa.
Intant bdiet tiggrava s-sitwazzjoni minħabba l-Covid-19; bdew jiżdiedu r-restrizzjonijiet, jonqsu t-titjiriet, jingħalqu wkoll xi ajruporti … U Johann u Nicolette kienu għadhom l-Indja jistennew li jinħareġ il-passaport taċ-ċkejkna Francesca. Iżda fl-Indja wkoll beda l-‘lockdown’ u b’hekk il-karti ma setgħux jiġu pproċessati. Hu maħsub li dan il-‘lockdown’ ser idum sal-aħħar ta’ April, u għalhekk Nicolette u Johann qed jgħixu mal-familja f’kamra żgħira f’lukanda mingħajr kuntatt fiżiku ma ħadd. Qed jgħaddu ġranet sħaħ b’ikel limitat u joħorġu biss biex jixtru l-ħalib u l-bżonnijiet għat-tfal. U bħalma wieħed jista’ jimmaġina l-ispejjeż bdew telgħin ukoll.
Iżda f’dan il-mument iebes din il-familja qed tagħmel esperjenza qawwija ħafna tal-imħabba t’Alla li qed turi ruħha anki permezz tal-qalb ġeneruża ta’ bosta nies, li forsi anki bil-kemm jafuhom, u li qed jibagħtulhom messaġġi, donazzjonijiet u kliem ta’ kuraġġ.
Huma jħossu wkoll il-qawwa tat-talb li qed tikkumpanjahom f’din l-avventura u grati ħafna ta’ dan.
Ruth & Brian Spiteri
[:]
