Il-festa liturġika ta’ Santa Chiara ta’ Assisi li ssir fil-11 ta’ Awwissu tfakkarna f’dik li kienet l-ewwel segwaċi ta’ San Franġisk u wkoll fi Chiara Lubich. It-tnejn kellhom imħabba kbira għal Alla; u għalkemm dawn iż-żewġ nisa kbar għexu fi żmenijiet differenti, huma kellhom ħafna affarijiet komuni f’dak li għandu x’jaqsam mal-messaġġ Nisrani u mal-kapaċità li jegħlbu l-konvenzjonijiet ta’ żmienhom.
Fl-1987, waqt li saħqet li għandna nagħżlu lil Alla u nagħtuh l-ewwel post ta’ ħajjitna, Chiara Lubich xeħtet dawl fuq il-karatteristika ewlenija ta’ dawk li l-ħajja tagħhom hi ispirata mill-kariżma tal-unità.
“Meta konna żgħar, tant konna milquta minn dak li Santa Chiara qalet lil San Franġisk, li tista’ tgħid kważi kaxkarha għal warajh fit-triq li kien miexi fiha hu. Staqsieha: ‘Binti, x’tixtieq?’ Wieħed seta’ jistenna diversi tweġibiet; jistenna li tgħidlu: ‘Irrid nimxi warajk fit-triq tal-faqar,’ jew ‘Irrid insir soru,’ jew ‘Irrid ningħalaq f’kunvent,’ … Iżda minflok hi laqtet il-musmar fuq rasu. ‘Binti, x’tixtieq?’ staqsieha, u hi wieġbet: ‘Alla’.
Xtaqet lil Alla għax għażlet lil Alla, proprju kif Alla kien għażel lilha.
Din hi l-istess għażla li aħna għamilna fil-bidu tal-Moviment; għamilna għażla waħda biss: Alla! Alla feġġ fost ħafna bumbardamenti u affarijiet oħra; u aħna emminna f’Alla, u għamilnieh l-ideal ta’ ħajjitna. U naraw kif dan jibqa’ dejjem ġdid, għax din l-għażla ta’ Alla twassalna biex inwarrbu dawk id-diversi forom ta’ ġid li nistgħu nakkumulaw mingħajr lanqas biss nindunaw. Aħna nistgħu nkunu sinjuri bil-ħajja li ngħixu fil-Fokolare, bl-affarijiet, b’dak li naħsbu u bl-istudju; nistgħu nkunu sinjuri bir-rabtiet fil-familja, forsi sinjuri bis-saċerdozju jew b’xi ħaġa akbar minn hekk. Iżda, l-ideal tagħna — Ġesù Abbandunat, li hu xejn, li xejjen lilu nnifsu — iwassalna biex inwarrbu dan kollu ħalli nagħtu l-ewwel post lil Alla u ngħixu l-bqija bħala rieda tiegħu.
Santa Chiara tfakkarna f’dan anki llum. Hija għamlet dan billi għażlet it-triq tal-faqar; aħna nagħmluh billi nagħżlu t-triq tal-unità, billi nżommu dejjem lil Ġesù Rxoxt f’nofsna, u b’ Ġesù fina permezz tal-imħabba tagħna lejn Ġesù Abbandunat.”
Mollens, 11 ta’ Awwissu, 1987
Ritratt: CSC Audiovisivi
