Chiara t’Assisi u Chiara Lubich: għażla waħda, dik ta’ Alla

Fl-11 ta’ Awwissu niċċelebraw il-festa ta’ Santa Chiara t’Assisi. F’din il-ġurnata, għal snin, il-Moviment tal-Fokolari kien jiffesteġġa wkoll lil Chiara Lubich. Meta twieldet hi kienet ġiet mogħtija l-isem ta’ Silvia Lubich, iżda aktar ‘l quddiem ħadet l-isem ta’ Chiara, għax, kif irrakkuntat hi stess fir-rivista "Fides" fl-1948, tant kienet milquta mill-għażla ta’ Alla li għamlet il-Qaddisa ta’ Assisi.

“Kien żmien il-gwerra. U aħna, tfajliet li kellna għal qalbna tant ħolm dwar il-ġejjieni: dar, skola, persuni għeżież, karriera… bdejna naraw kollox jiġġarraf quddiem għajnejna. U l-Mulej lissen bil-fatti waħda mill-kliem eterni tiegħu: “Kollox huwa frugħa, xejn ħlief frugħa.” (…)

U ntbaħna li ideal wieħed huwa veru u ma jmut qatt: Alla. Filwaqt li bdejna naraw il-qerda li ġabet tant mibegħda, fil-moħħ żagħżugħ tagħna feġġ b’mod ħaj Dak li ma jmutx. RajnieH u ħabbejnieH fl-essenza tiegħu: Deus caritas est.

Il-ħsibijiet u l-aspirazzjonijiet tagħna kienu ssiġillati minn bint oħra ta’ żmenijiet oħra, li ma tantx kienu differenti minn dawk tagħna: Chiara t’Assisi. Din għarfet iddawwal bid-dawl divin tagħha dlamijiet id-dnub u ssaħħan qlub kiesħa silġ bl-egoiżmu, il-mibegħda u l-ħdura.

Hi wkoll rat il-frugħa tad-dinja, għax il-Fqajjar t’Assisi, eżempju ħaj tal-faqar, għallimha “titlef kollox biex tirbaħ lil Ġesù Kristu”.

Meta f’nofs ta’ lejl ħarbet mill-kastell tax-Scifi biex tmur il-Porziuncola u il-Qaddis staqsieha: “Binti x’tixtieq?”, hi wkoll wieġbet: “Alla”.

Impressjonana l-fatt li din iż-żagħżugħa sabiħa, ta’ tmintax-il sena, mimlija tama, għarfet tiġbor ix-xewqat kollha ta’ qalbha f’Dak li hu biss jistħoqqlu mħabbitna. U bħalha, aħna ħassejna l-istess xewqa.

U għidna: “Alla hu l-ideal tagħna. Kif nagħmlu biex nagħtuh lilna nfusna b’mod sħiħ?” It-tweġiba tiegħu kienet: “Ħobbni b’qalbek kollha”.

U kif inħobbuh? “Min iħobbni jħares il-kmandamenti tiegħi. Ħobb lill-proxxmu tiegħek bħalek innifsek.” Ħarisna lejn xulxin u ddeċidejna li “nħobbu lil xulxin biex inħobbu lilU”. Aktar ma wieħed “jgħix” il-Vanġelu, aktar jifhem.

Chiara Lubich

Rivista “Fides” fl-1948