Il-Kelma t’Alla hi sisien li fuqha tinbena l-komunità. Waqt li ġġib bidla fil-ħajja tal-individwu, il-Kelma twasslu biex jagħraf li hu jagħmel parti mill-familja kbira t’Alla u li jista’ jagħti s-sehem tiegħu biex issaltan dik l-imħabba li Ġesù ġab fuq din l-art.
Ħafna jiġu f’kuntatt mal-ispiritwalità tal-unità permezz tal-laqgħat tal-Kelma tal-Ħajja li l-Moviment tal-Fokolari jagħmel f’diversi lokalitajiet, u dawk li jiltaqgħu mal-Kelma u jgħixuha, jsibu ruħhom flimkien ma’ oħrajn fl-iskola ta’ Ġesù.
Xhieda ta’ dan huma l-esperjenzi li ġejjin.
“Sibt ruħi ma’ grupp ta’ nies, li ma kont naf lil ħadd minnhom, ħlief lil min stedinni biex immur għal-laqgħa tal-Kelma tal-Ħajja. Mill-ewwel ħassejtni milquta mill-atmosfera sabiħa li kien hemm, u bqajt aktar milquta meta xi wħud bdew jaqsmu l-esperjenzi tagħhom dwar l-għajxien tal-Kelma. Din il-laqgħa kienet għalija bidu ta’ avventura ġdida.
Komplejt nattendi għal dawn il-laqgħat u bdejt niskopri dejjem aktar dik iċ-ċavetta prezzjuża li tiftaħ il-bieb għal relazzjoni radikali u profonda m’Alla u mal-proxxmu. Bdejt nagħraf kemm l-għajxien tal-Kelma jiġġenera relazzjonijiet veri u awtentiċi, imsejsa fuq l-imħabba li jgħallem Ġesù. Illum inħossni xxurtjata li qed nagħmel il-vjaġġ qaddis ta’ ħajti flimkien ma’ oħrajn li fil-Kelma t’Alla sabu “musbieħ għal riġlejhom” (ara Salm 119:105 ).
“Alla huwa Mħabba (1 Ġw 4, 16); Alla jħobbna, Alla jħobbok: din l-aħbar ġabet bidla kbira f’ħajti! Wasslitni biex niskopri l-veru wiċċ t’Alla, u ma nħarisx aktar lejh bħala dak l-imħallef lest biex jikkundanna l-iċken żball li stajt nagħmel. Ħelsitni mill-idea t’Alla li trawmet fija minħabba t-trobbija li kelli, u qanqlitni biex insir naf aktar dwaru. Bdejt niltaqa’ ma’ oħrajn li jemmnu tassew f’din l-imħabba kbira t’Alla, u wasalt biex jien ukoll niltaqa’ miegħu u nduq il-ferħ ta’ min jagħraf li Alla hu tassew Missier ħanin u li aħna lkoll uliedu. Ngħix il-Kelma tal-Ħajja flimkien ma’ oħrajn, u dan jgħinni nissaħħaħ fil-fidi, nikber fl-imħabba lejH u lejn ħuti l-bnedmin, u nħares ‘l quddiem b’tama”.
Ngħixu l-Kelma, p. 12-13
Siltiet mill-pubblikazzjoni oriġinali bit-Taljan Parole di Vita, mis-sensiela Opere di Chiara Lubich, maqluba għall-Malti mill-Moviment tal-Fokolari f’Malta. © Città Nuova Editrice, Ruma, 2017
